बन्दीपुरमा बालकथा वाचन, लेखन तथा चित्राङ्कन कार्यशाला सम्पन्न

bandipur-clfnneal.org-2017

बन्दीपुर, तनहूँ, २०७४, असार १० गते ।

कविवर द्वारिका श्रेष्ठका पूजनीय मातापिता बुद्धि–रेशमको स्मृतिमा जलरिका साहित्य प्रतिष्ठान र बालसाहित्य प्रतिष्ठान नेपालको सहकार्यमा बन्दीपुरका बालबालिकाका लागि दुई दिने कथावाचन, लेखन तथा चित्राङ्कन कार्यशाला गत असार ९ र १० गते सम्पन्न भयो । तालिममा विभिन्न विद्यालयका २३ जना बालबालिकाहरु सहभागी हुनुभएको थियो । 

कथावाचन तथा लेखनको तालिम बालसाहित्य लेखक तथा देशका ३७ जिल्लामा कथावाचन गरिसक्नुभएका कथावाचक कार्तिकेय घिमिरेले र चित्राङ्कनको तालिम प्रतिभाशाली युवा चित्रकारहरु सुमन महर्जन र सोनाम तामाङले दिनुभएको थियो ।

उक्त अवसरमा बन्दीपुरको सामुदायिक पुस्तकालयलाई बुकआर्ट नेपाल, बालसाहित्य प्रतिष्ठान नेपाल र केटाकेटी मिडियाबाट प्रकाशित बालपुस्तकहरु र ‘कवि द्वारिका श्रेष्ठका समग्र कविता’ र कथाकार जलेश्वरी श्रेष्ठको नवीनतम कृति ‘म्यारिज एनिभर्सरी र अरु कथाहरु’ पनि एक/एक प्रति उपहार प्रदान गरिएको थियो ।

भानु माध्यमिक विद्यालय, बन्दीपुर, तनहूँमा आयोजित कार्यक्रम उक्त विद्यालयका प्रधानाध्यापक दीप बहादुर खत्रीले संयोजन गर्नुभएको थियो ।

कार्यशालामा बालबालिकाहरुले रचना गर्नुभएको कथा र उहाँहरुले नै बनाउनुुभएको चित्र समावेश गरी ‘बन्दीपुरका बालबालिकाका कथा’ नामक कृति प्रकाशित गरिने बुकआर्ट नेपाल प्रकाशनद्वारा जारी विज्ञप्तीमा जनाइएको छ । 

 

Segment: 
Language: