माटो कति राम्रो ? - दैवज्ञराज न्यौपाने

daibgya-raj-neupane

सुन राम्रो, चाँदी राम्रो, मोती झनै राम्रो
सबैभन्दा राम्रो धर्ती माटो कति राम्रो ?



सुन दिन्न खान मलाई चाँदी खान दिन्न
तिर्खा लाग्दा प्यँनु हुन्न मोती खान हुन्न
किन चाहियो बाबा, मलाई ? लोभ लाग्ने बानी
भोक लाग्दा अन्न पाउँ तिर्खा लाग्दा पानी ।

धान फल्दा सुन फल्छ मकै फली मोती
कपासमा चाँदी फल्ने कति राम्रो खेती ?
किन चाहियो, बाबा मलाई ? व्यर्थै अरु खानी
माटो मेरो जिन्दगी हो जीवन मेरो पानी ।

फल फल्ने पसीनाको बीज पौरखको
कर्म गर्ने पाखुरीमा जीत जिन्दगीको
किन चाहियो, बाबा मलाई ? व्यर्थै अरु फल
भाग्य दिने धर्ती मेरो विश्वासको बल ।
               (२०३७ कार्तिक, गोगने, भोजपुर)

Literature: 
Language: