आफ्नो मातृभाषा (तामाङ भाषा) मा निवन्ध संग्रह रचना गर्ने बालिका याङ्जी थोकरलाई 'कार्तिकेय बालप्रतिभा पुरस्कार, २०७५' प्रदान गरिने भएको छ । उनको 'चिडियाखाना कोर्निमा' (चिडियाखाना घुम्न जाँदा) नामक बालनिबन्ध संग्रह तामाङ भाषामा प्रकाशित भएको छ । आफ्नो मातृ भाषामा बालसाहित्य सिर्जना गर्ने यी बालिकालाई प्रोत्साहनस्वरुप यो पुरस्कार प्रदान गरिएको कार्तिकेय ट्रस्टले जनाएको छ । उनलाई पुरस्कार स्वरुप नगद रु ५ हजार प्रदान गरिने भएको छ । वासु मावि, भक्तपुरमा कक्षा १० मा अध्ययनरत यिनी बालसाहित्यका किताबहरु खुबै पढ्छिन् । यिनलाई मन परेको पुस्तक साहित्यकार रामेश लिखित 'मैले बिर्सन नसकेको साथी' नामक कृति हो । याङ्जी साहित्यकार ईश्वर थोकरकी बहिनी हुन् । यिनले भेटका क्रममा आफूले कार्तिकेय लिखित बालकथाहरु थुप्रै पढेको बताइन् । यिनी भन्छिन्, मलाई कार्तिकेय लिखित ‘म चोर होईन’ कथा खुबै मनपर्यो ।
