नेपाली बालकथाको अंग्रेजी अडियो किताब, ब्रिटिस कथावाचकलाई सम्मान

susannaha-aldred-uk

काठमाडौं, असार ९ गते ।
   दृष्टिविहिन बालबालिकाको सहयोगार्थ नेपाली बालकथाको अडियो किताब उत्पादन हुने भएको छ । यस कथा एल्बममा नेपालीमा १५ वटा र अंग्रेजीमा १५ वटा गरी तिसवटा कथा समावेश गरिएको छ । नेपाली कथावाचन बालसाहित्य लेखक एवं बालसाहित्य प्रतिष्ठानका अध्यक्ष कार्तिकेयले गर्नुभएको छ भने अंग्रेजी कथावाचन ब्रिटिस कथावाचक सुसाना अल्ड्रेडले गरेकी छिन् ।

वेलायतका सामुदायिक पुस्तकालयहरुमा र निम्न माध्यमिक तहमा अध्ययनरत नेपाली दृष्टिविहिन बालबालिकाहरुलाई निःशुल्क वितरण गरिने लक्ष्यका साथ तयार भएको यस बालकथा एल्बम नेपाली बालकथाको सुन्ने किताब को पृष्ठभूमि संगीत संयोजन चर्चित गायक संजय खड्गी र रेडियोकर्मी सृजना खड्काले गर्नुभएको छ ।
   यस सुन्ने किताबमा समावेश १५ अंग्रेजी भाषाको कथा कार्तिकेयले रचना गरेका  हुन् । जसको अंग्रेजी अनुवाद महेश पौड्यालले र सम्पादन ब्रिटिस कथावाचक सुसानाले गर्नुभएको हो ।
समाजसेवी दिदीबहिनी करुणा खड्गी र शिला खड्गीको प्रकाशन सहयोगमा यो एल्बम उत्पादन हुन लागेको हो ।

सम्मानको कार्यक्रम सम्पन्न,

     बालसाहित्य प्रतिष्ठानले बालबालिकाको पठन सिपको विकासका लागि निरन्तर सक्रिय रही आयोजना गर्ने कार्यक्रममा विशिष्ट सहयोग गर्नु हुने समाजसेवी एवं वरिष्ठ बालरोग विशेषज्ञ डा. अच्युतमणि आचार्य र कथावाचनमा सहयोग गरी प्रतिष्ठानको कार्यक्रम सफल बनाउन योगदान दिनुहुने ब्रिटिस कथावाचक सुसानालाई एक समारोहबीच सम्मान गरेको छ । प्रतिष्ठानका केन्द्रीय अध्यक्ष कार्तिकेयको सभापतित्वमा भएको उक्त कार्यक्रममा प्रतिष्ठानका उपाध्यक्ष महेश पौड्यालले प्रतिष्ठानको परिचय र गतिविधि प्रस्तुत गर्नु भएको थियो । उक्त कार्यक्रममा बोल्दै अध्यक्ष कार्तिकेयले प्रतिष्ठान विभिन्न विदेशी सम्पादकसँगको सहकार्यमा नेपाली कथालाई विश्व बजारमा प्रवेश गराउन यो ५ वर्ष नेपालका नयाँ नयाँ कथा खोज्ने र त्यसको विभिन्न विदेशी भाषाको संस्करण निकाल्ने बताउनु भएको थियो । समारोहमा बोल्दै ब्रिटिस कथावाचक सुसानाले आफूले प्रतिष्ठानलाई वेलायतमा रहेका बालसाहित्यसम्बन्धी संस्थासँग जोड्ने पुलको काम गर्ने धारणा राख्नु भएको थियो ।

Segment: 
Language: