Author: Ketaketi Online

प्रशान्त महासागरमा भएको ज्वालामुखी विष्फोटबाट टोंगा टापुमा ४ जनाको मृत्यु भएको छ । मृत्यु हुनेमा तीन जना टोंगाकै स्थानीय रहेका छन् भने एक जना बेलायती नागरिक रहेको बताइएको छ । ज्वालामुखी विष्फोटका कारण त्यहाँको मुख्य विमानस्थलमा क्षति पुगेपछि पानी जहानबाट उद्दार टोली र राहत सामग्री पुर्‍याइएको छ । क्षतिग्रस्त टोंगाको मुख्य विमानस्थलमा ज्वालामुखी विष्फोटका कारण जम्मा भएको खरानी सहितको भग्नावेश पन्छाउने काम भइरहेको छ ।

बढ्दो कोभिड–१९ सङ्क्रमणको जोखिमलाई दृष्टिगत गरी काठमाडौँ उपत्यकाका तीनवटै जिल्ला प्रशासन कार्यालयले धार्मिक स्थलमा हुने नित्य पूजा र प्रार्थना बाहेकका सबै पूजामा रोक लगाएका छन् भने आमसभा, जुलुस, सभा, भेलालगायत गतिविधि पनि निषेध गरेका छन् । कोभिड–१९ को नयाँ भेरिएन्ट ओमिक्रोन सहितको सङ्क्रमण नियन्त्रण तथा उपचारलाई थप प्रभावकारी बनाउन मंगलबार मध्यरातदेखि माघ मसान्तसम्म लागू हुने गरी काठमाडौँ, ललितपुर र भक्तपुर जिल्ला प्रशासन कार्यालयले बेग्लाबेग्लै आदेश जारी गरी भीडभाड हुने गतिविधिमा रोक लगाएका हुन् ।

काठमाडौं उपत्यकामा कोरोना संक्रमितको संख्या उच्च गतिमा बढेपछि आजैदेखि पशुपति नाथ मन्दिर प्रवेशमा रोक लगाइएको छ । मन्दिर लगायतका सार्वजनिक स्थलमा भिडभाड हुनेहुँदा संक्रमणको जोखिम बढेको भन्दै सरकारले पशुपति नाथ मन्दिर भक्तजनका लागि बन्द गरेको हो । यसै गरी गोरखाको मनकामना मन्दिरले पनि आगामी शुक्रबारदेखि भक्तजनलाई प्रवेशमा रोक लगाउने भएको छ । देशभर तेस्रो लहरको कोरोना सङ्क्रमण बढ्दै गएपछि सङ्क्रमण फैलन सक्ने जोखिमलाई ख्याल गर्दै मन्दिर प्रवेशमा रोक लगाउने निर्णय गरिएको हो ।

अमेरिका र क्यानडाका केही भागमा उच्च हिमपात सहितको हिमआँधी नै आउन सक्ने भन्दै नागरिकहरुलाई चेतावनी दिइएको छ । बाक्लो हिमपातका कारण अमेरिका र क्यानडाका दक्षिण पूर्वी राज्यहरुमा हजारौं उडानहरु रद्द गरिएका छन् । कयौं घरहरुमा विद्युत सेवा अवरुद्ध भएको छ । अमेरिकाका भर्जिनिया, उत्तरी र दक्षिणी क्यारोलिना राज्यले संकटकालको घोषणा गरेका छन् । हिमपात र हिमआँधीबाट अमेरिकाका पूर्वी राज्यहरु विगत दुई दिनदेखि बढी प्रभावित भएका छन् । हिमपात र हिमआँधीले न्युयोर्क शहर र कनेक्टिकट राज्यका केही भागहरु सडक र अन्य पूर्वाधारमा समेत असर गर्न सक्ने भन्दै सचेत गराइएको छ ।

भारतमा विगत केही दिनदेखि कोरोना संक्रमण उच्च गतिमा बढेको छ । पछिल्लो २४ घन्टामा मात्रै भारतमा २ लाख ५७ हजारभन्दा बढी नयाँ संक्रमित थपिएका छन् । यसै गरी कोरोनाकै कारण दैनिक मृत्यु दरमा पनि वृद्धि भएको छ । संक्रमण दर व्यापक रुपमा बढेपछि विभिन्न राज्यहरुले प्रतिबन्धात्मक व्यवस्थामा कडाई गरेका छन् । राजधानी नयाँ दिल्ली, व्यापारिक राजधानी मुम्बई लगायतका स्थानमा शैक्षिक संस्थाहरु बन्द गरिएका छन् ।