Category: समाचार

विश्वभरि नै कोरोना संक्रमण दर विस्तारै घट्न थालेको छ । पछिल्लो २४ घन्टामा विश्वभर थपिने नयाँ संक्रमितको संख्या २० लाखमा झरेको छ । यो संख्या अघिल्लो साता ३२ देखि ३५ लाख रहेको थियो । विश्वमै उच्च संक्रमण दर र मृत्युदर रहेको संयुक्त राज्य अमेरिकामा संक्रमण दर र मृत्युदर दुबैमा उल्लेख्य कमी आएको छ । बितेको २४ घन्टामा अमेरिकामा ७२ हजार बढी नयाँ संक्रमित थपिए । अघिल्लो सातासम्म अमेरिकामा एकै दिनमा ७ लाखभन्दा बढी नयाँ संक्रमित थपिने गरेका थिए ।

अमेरिका र क्यानडाको सीमा वारपार गर्न कोरोना विरुद्धको खोप अनिवार्य गरिएपछि क्यानडाका ट्रक चालकहरुले विगत दुई दिनदेखि राजधानी ओटावामा प्रदर्शन गरिरहेका छन् । तथाकथित स्वतन्त्रता संग्राम नाम दिइएको अभियानमा  हजारौं प्रदर्शनकारी सहभागी भएका छन् । प्रदर्शनमा स्वास्तिक झण्डा, चिहान माथि महिलाको नृत्य र सैनिकको भेषमा गैरसैनिक पनि देखिएपछि प्रहरीले थप अनुसन्धान गर्ने जनाएको छ ।

जिल्लाका अति विपन्न सुत्केरीलाई आर्थिक सहयोग गरिएको छ । जिल्ला अस्पताल हुम्लाका नर्स केसाङ डोल्मा लामाले विभिन्न सामाजिक संस्थाको आर्थिक सहयोगमा जिल्लाका उनीहरुलाई चामल, दाल, नुन, चिनी, तेल र अण्डा सहयोग गरिएको जानकारी दिनुभयो । जिल्ला अस्पतालमा सुत्केरी भएकामध्ये विपन्नलाई तीन हजार ७ सय ५० रुपैयाँ बराबरको आर्थिक सहयोग गरिएको उहाँले बताउनुभयो ।

म्याग्दीको बेनी अस्पतालमा स्थापना भएको भेन्टिलेटर सहितको सघन उपचार कक्ष (आइसियू) प्रयोगमा आउन सकेको छैन । करोडौं खर्चेर जडान गरिएका ती महत्वपूर्ण उपकरण सञ्चालन गर्ने दक्ष जनशक्ति नभएर थन्किएका हुन् । गम्भीर प्रकृतिका बिरामीलाई जिल्लामै सर्व सुलभ उपचारको व्यवस्था मिलाउन गण्डकी प्रदेश सरकारले विसं २०७६ असारमा अस्पतालमा रु. एक करोड २५ लाख खर्चेर दुई वटा भेन्टिलेटर सहित पाँच शैया क्षमताको आइसियू कक्ष स्थापना गरेको थियो ।

आदिवासी जनजाति समन्वय समिति रामपुरले कला संस्कृतिको संरक्षण एवं प्रवद्र्धन गर्न यहाँका मगर नेवार समुदायलाई मौलिक वाद्यवादन सामग्री सहयोग गरेको छ । समितिले रामपुर नगरपालिकाका १४ मगर समूहलाई एक-एक थान मादल र खैजडी चाप, नेवार समूहलाई ढोलक र झ्याली प्रदान गरेको हो । सो अवसरमा समितिका अध्यक्ष ईश्वरी श्रेष्ठले पुर्खौली पेसालाई निरन्तरता दिन वाद्यवादनका सामग्री समूहलाई उपलब्ध गराएको बताउनुभयो ।

प्रत्येक वर्ष माघ १६ गते मनाइने सहिद दिवस प्रजातन्त्र स्थापना एवं पुनःस्थापना तथा विभिन्न कालखण्डका स्वतन्त्रताका लागि जीवन आहूति दिने सहिदको सम्झनामा विविध कार्यक्रम गरी आज देशभर मनाइयो ।
माघ १० देखि १६ गतेसम्म विभिन्न कार्यक्रमका साथ सहिद सप्ताह मनाउने घोषणा गरी विविध कार्यक्रम हुँदैआएको छ। विसं २०१२ देखि नै तत्कालीन काठमाडौँ नगरपालिकाको संयोजकत्वमा प्रत्येक वर्ष माघ १६ गते सहिदको सम्झनामा दिवस मनाउन थालिएको हो।