Category: समाचार

काठमाडौँको ब्राईट फ्युचर माध्यमिक विद्यालयले ‘इन्टरनेशनल स्कुल अवार्ड’ प्राप्त गरेको छ । जिल्लाको पश्चिम भेगमा शैक्षिक धरोहरका रुपमा परिचित ब्राईट फ्युचर माध्यमिक विद्यालयले ब्रिटिस काउन्सिलद्वारा प्रदान गरिने ‘इन्टरनेशनल स्कुल अवार्ड २०२०-२०२३’ प्राप्त गरेको हो । अन्तर्राष्ट्रिय रुपमा विद्यालयलाई उत्कृष्ट स्तरको मान्यता दिने इन्टरनेशनल स्कुल अवार्ड प्राप्त गरेपछि विद्यालयमा खुसियाली छाएको संयोजक बुद्ध गौतमले बताउनु भयो। 

डोटीमा १८ वर्षभन्दा माथिका ५१ प्रतिशतले कोरोना विरुद्धको पूर्ण मात्रा खोप लगाएका छन् । जिल्ला स्वास्थ्य कार्यालय डोटीले दिएको जानकारी अनुसार पहिलो डोज लगाउनेको संख्या ९३ हजार ८९ छ । ७२ हजार २५० जनाले दुवै डोज खोप लगाएका छन् । ४६ हजार ७५९ जनाले भेरोसेल र १५ हजार २२४ जनाले कोभिसिल्ड खोपको दुवै डोज लगाएका हुन् ।
४६ हजार ७५९ जनाले भेरोसेल र १५ हजार २२४ जनाले कोभिसिल्ड खोपको दुवै डोज लगाएका हुन् । यस्तै १० हजार २६७ जनाले जोन्सन एण्ड जोन्सन खोप लगाएको स्वास्थ्य कार्यालय डोटीका तथ्याङ्क अधिकृत महेशप्रसाद बोहराले जानकारी दिनुभयो ।

सरकारले प्राथमिकताका साथ कोभिड-१९ विरुद्धको खोप निःशुल्क लगाएपछि दक्षिण एशियामै धेरै प्रतिशत जनसङ्ख्याले खोप लगाउने मुलुकमा नेपाल पनि परेको छ । आगामी चैत मसान्तसम्म १८ वर्षमाथिका सबै नागरिकलाई पूर्णमात्रा खोप लगाइसक्ने लक्ष्य लिएको सरकारले हालसम्म ७१ प्रतिशतलाई पहिलो मात्रा खोप दिइसकेको छ भने ६१ प्रतिशतले दुवै मात्रा खोप लगाइसकेका छन् ।

कोरोना प्रभावका कारण यस वर्षको सहिद सप्ताह कार्यक्रम औपचारिक रूपमा मात्र मनाइएको छ । महामारीको प्रभावले यस वर्ष सहिद सप्ताहको दिन माघ १६ गते हुने प्रभातफेरी कार्यक्रम पनि नहुने काठमाडौं महानगरपालिकाले जनाएको छ ।
काठमाडौं महानगरपालिकाका प्रमुख विद्यासुन्दर शाक्यका अनुसार कोभिड–१९ महामारीको तेस्रो लहर नियन्त्रणका लागि यस वर्ष विगतका वर्षमा झैँ सहिद दिवस मनाइने छैन ।

टर्कीको राजधानी इस्तानबुलमा मंगलबारदेखि निजी यातायातका साधन सञ्चालनमा रोक लगाएको छ । देशको सबैभन्दा ठूलो सहर समेत रहेको इस्तानबुलमा व्यापक हिमपात भएकाले यातायातका साधन सञ्चालन रोक लगाएको हो । मंगलबार विहान जारी गरिएको वक्तव्यमा इस्तानबुलका गभर्नर अली येर्लिकायाले सार्वजनिक यातायात मात्रै सञ्चालन हुन दिन आग्रह गर्नुभएको छ ।

आफन्तको मृत्युपश्चात् समवेदना प्रकट गर्न लगिने भेटी व्यवस्थापन गर्न कठिन बन्दै गएको छ । पछिल्लो समय भेटीका रूपमा लगिने समवेदना फ्रेम, फलफूल, चिनी, मिश्रीजस्ता वस्तुको व्यवस्थापन कठिन हुने गरेको हो । खानेकुरा अनाथालय, आश्रममा पठाइने भए पनि समवेदना व्यक्त गरिएका फ्रेम व्यवस्थापन झन्झटिलो बन्ने गरेको हो ।

बेलायतमा कोरोना भाइरसको महामारी न्युनिकरणका लागि लगाइएका सबै प्रतिवन्धात्मक व्यवस्था आगामी महिनादेखि हटाइने भएको छ ।  फेब्रुअरी ११ देखि सबै प्रतिवन्धात्मक व्यवस्था हटाउने निर्णय लागू हुने अधिकारीहरूले जानकारी दिएका छन् । प्रतिवन्धात्मक व्यवस्था हटाइएसँगै भारत लगायतका देशबाट बेलायत प्रवेश गर्न पनि खुल्ला हुनेछ । तर ती यात्रुहरूले खोपको पूरा मात्रा लगाएको हुनुपर्ने शर्त भने राखिएको छ ।