Category: समाचार

भारतमा कोरोना भाइरस विरुद्धको खोप अभियान तीव्र गतिमा अघि बढेको छ ।  भारतका १५ देखि १८ वर्षसम्मका पाँच करोडभन्दा बढी युवाले कोरोना भाइरस विरुद्धको पहिलो खोप लगाएका छन् । ठुलो मात्रामा खोप लगाएकाहरुको सङ्ख्या देखिएकाले पछिल्ला दिनमा कोरोना भाइरस विरुद्धको लडाई सहज हुने अधिकारीहरूले बताएका छन् । खोप लगाउन बाँकी रहेका अन्य व्यक्तिलाई समेत छिट्टै खोप लगाउन अनुरोध गरिएको छ ।

काठमाडौँ उपत्यकामा लगाइएको जोरबिजोर प्रणालीकाे नियम आजदेखि हटेको छ ।  कोभिड–१९ सङ्कट व्यवस्थापन समन्वय केन्द्र (सीसीएमसी) को बैठकले उपत्यकामा लगाउँदै आएको जोरबिजोर प्रणाली हटाउने निर्णय गरेकव हो । काठमाडौं उपत्यकाका तीन वटै जिल्लाका प्रमुख जिल्ला अधिकारीको बैठकले गए रातिदेखि लागू हुने गरी जोरबिजोर प्रणाली हटाएको हो ।
नेपालमा कोरोना सङ्क्रमण बढेसँगै माघ ८ गतेदेखि लागू हुने गरी सार्वजनिक एवं निजी सवारी साधनमा जोरबिजोर प्रणाली लागू गरिएको थियो ।

हाल देशभर पश्चिमी वायुको सामान्य प्रभाव छ । सो मौसमी प्रणालीको प्रभावले अहिले देशको पहाडी भू–भागमा आंशिकदेखि सामान्य बदली रहेको मौसम पूर्वानुमान महाशाखाले जनाएको छ । आज दिउँसो आंशिकदेखि सामान्य बदली रहनेछ । प्रदेश नं १ का पहाडी भू–भागको केही स्थानमा हल्का वर्षाको सम्भावना छ । रातिको समयमा पनि प्रदेश नं १, बागमती र गण्डकी प्रदेशमा आंशिकदेखि सामान्य बदली रहने छ भने बाँकी प्रदेशमा मौसम सफा रहनेछ ।

आगामी फागुन १ गतेदेखि भौतिक रुपमा कक्षा संचालन गर्ने गरी शैक्षिक संस्था विद्यालय खुल्ला गरिने भएको छ । काठमाडौं  उपत्यकाका तीन प्रमुख जिल्ला अधिकारीको बैठकले फागुन १ गतेदेखि भौतिकरुपमा कक्षा सञ्चालन गर्न सकिने जनाएको हो । १२ वर्ष पूरा भएका बालबालिकालाई स्वास्थ्य मापदण्ड पालना गरेर नियमित कक्षामा सहभागी हुन दिने तथा १२ वर्षमुनिका बालबालिकालाई भने बार अनुसार आलोपालो कक्षामा सहभागी गराउने निर्णय गरेको छ ।
यसैगरी, डान्सबार, दोहोरी, नाचघर, क्बललगायत रात्रिकालीन व्यवसाय भने फागुन १ गतेदेखि राति १० बजे अगाडिसम्म मात्र सञ्चालन गर्न दिने निर्णय भएको छ ।

कर्णालीको मुख्य स्वास्थ्य समस्याका रूपमा रहेको कुष्ठरोग पछिल्ला वर्ष भने घट्दो दरमा रहेको पाइएको छ । प्रदेश स्वास्थ्य सेवा निर्देशनालयले पाँच वर्षअघि र यसपछिका वर्षहरूको तुलना गर्दै कुष्ठरोगका बिरामी घट्दो दरमा रहेको जनाएको छ । प्रदेश स्वास्थ्य निर्देशक डा रविन खड्काले पाँच वर्षअघि बिरामी पत्ता लाग्ने दर ६.४९ प्रतिशततथाहाल ३.६७ प्रतिशत रहेको बताउनुभयो । “कर्णालीमा कुष्ठरोग निवारणको चरणमा पुगेको छ, बिरामीको पहिचान वर्षेनी घट्दो क्रममा छ”, उहाँले भन्नुभयो, “समयमै रोग पत्ता लगाएर नियमित उपचार गरेमा यो पूर्णरूपमा निको हुन्छ, अपाङ्गता हुनबाट बच्न सकिन्छ ।”

विश्वभरि नै कोरोना भाइरसको संक्रमण दर घटेको छ । उच्च संक्रमण दर रहेका अमेरिका, बेलायत, फ्रान्स, जर्मनी, इटाली, स्पेन र भारतमा पनि उल्लेख्य रुपमा संक्रमण घटेको छ । दुई साता अघि सम्म ७ लाखसम्म पुगेको अमेरिकाको कोरोना संक्रमण दर घटेर अहिले ९१ हजारमा झरेको छ । केही दिन अघिसम्म तीन लाख नजिक पुगेको भारतको संक्रमण दर पनि १ लाखमा झरेको छ ।
फ्रान्समा पछिल्लो २४ घन्टामा २ लाख १५ हजारको हाराहारीमा नयाँ संक्रमित थपिएका छन् । केही दिन अघिको तुलनामा फ्रान्समा पनि संक्रमण घटेको हो ।