Category: समाचार

युगाण्डामा सोमबारदेखि विद्यार्थीहरूले विद्यालयमै उपस्थित भएर अध्ययन गर्न थालेका छन् । युगान्डामा कोरोना महामारीका कारण विश्वमै सबैभन्दा लामो समयसम्म विद्यालय बन्द गरिएको थियो । लामो समयपछि विद्यार्थीहरुको भौतिक उपस्थितिमा पठनपाठन सुरु भएको हो । युगाण्डामा कोरोना भाइरसको महामारीका कारण झन्डै दुई वर्ष विद्यालय बन्द गरिएको थियो । युगाण्डामा सन् २०२० को मार्चदेखि ८३ हप्तासम्म विद्यालय बन्द भएको हो । विद्यालय खुल्ला भएपछि दशौँ लाख विद्यार्थीहरू खुशी भएर विद्यालय फर्किएका छन् ।

अमेरिकाका एक पुरुषमा सुँगुरको मुटु सफलतापूर्वक प्रत्यारोपण गरिएको छ । अमेरिकाको बाल्टिमोरका ५७ वर्षीय डेभिड ब्यानेटलाई अनुवांशिक रुपमा परिमार्जन गरिएको सुँगुरको मुटु प्रत्यारोपण गरिएको हो । सुँगुरको मुटु मानिसमा प्रत्यारोपण गरिएको विश्वमै पहिलोपटक हो । चिकित्स टोलीले ७ घन्टा लामो शल्यक्रिया गरी मुटुको प्रत्यारोपण गरेका हुन् ।

कोभिड–१९ संकट व्यवस्थापन समन्वय केन्द्र सिसिएमसीसीको सिफारिस कार्यान्वयन गर्दै  शिक्षा विज्ञान तथा प्रविधि मन्त्रालयले आगामी माघ १५ गतेसम्म विद्यालय बन्द गर्ने निर्देशन जारी गरेको छ । मन्त्रालयमा हिजो बसेको बैठकले सीसीएमसीसीले गरेको सिफारिस कार्यान्वयनमा पठाउने निर्णय गरेको शिक्षा मन्त्रालयका प्रवक्ता दीपक शर्माले  विज्ञप्ति मार्फत् जानकारी दिनुभएको छ ।

काठमाडौं उपत्यकामा आजदेखि बालबालिकाका लागि कोरोना विरुद्धको खोप अभियान सुरु हुन लागेको छ । देशका कतिपय जिल्लाम यसअघि नै बालबालिकाका लागि खोप लगाउन शुरु भैसकेको छ । आजबाट काठमाण्डौँ उपत्यकाका तीनै जिल्लाका स्थानीय तहसँग समन्वय गरेर १२ देखी १७ बर्ष उमेर समूहका बालबालिकाकाहरुका लागि खोप अभियान संचालन हुन लागेको हो । काठमाण्डौ, ललिपुर र भक्तपुरमा फाइजर र मोडर्ना खोप दिइने स्वास्थ्य तथा जनसङ्ख्या मन्त्रालयले जनाएको छ ।

सबै जातजाति, भाषाभाषीको सहयोग लिएर नेपाल एकीकरणको शुरुवात गर्नुभएका पृथ्वीनारायण शाहको सम्झनामा पृथ्वी जयन्ती तथा राष्ट्रिय एकता दिवस मनाउन लागिएको हो । नेपाल प्रज्ञा–प्रतिष्ठान, नेपाल ललितकला प्रतिष्ठान, नेपाल सङ्गीत तथा नाट्य प्रज्ञा–प्रतिष्ठान र सांस्कृतिक संस्थानको आयोजनामा कमलादीबाट सांस्कृतिक झाँकी एवं बाजागाजासहित सिंहदरबार पश्चिम मूलढोकास्थित पृथ्वीनारायण शाहको सालिकमा जम्मा भई माल्यार्पण गर्ने कार्यक्रम रहेको छ ।

विवेकशील साझा पार्टीले पृथ्वी जयन्तीको अवसर पारेर यही पुष २७ गते देखि माघ १६ सम्म गर्ने तय भएको ‘मेची-महाकाली राष्ट्रिय एकता यात्रा’ स्थगन गरेको छ।
झापादेखि कञ्चनपुरसम्मका दर्जनौँ स्थानमा अध्यक्ष रवीन्द्र मिश्रसहित उच्च नेतृत्व सहभागी भई आमसभा र अन्तरक्रिया गर्ने अन्तिम तयारी भइसकेको अवस्थामा पछिल्ला दिनमा ह्वात्तै बढेको कोरोना भाइरस सङ्क्रमणको स्थितिलाई दृष्टिगत गरी पार्टीले यात्रा स्थगन गर्ने निर्णय गरेको हो।

केटाकेटी अनलाइन युट्युब च्यानलमा वर्षका सबैभन्दा बढी हेरिएको लेखक पुरस्कार साहित्यकार सुशीला देउजालाई र कान्छा स्रष्टा पुरस्कार कान्छी चित्रकार आश्रिति श्रेष्ठलाई प्रदान गरिने भएको छ ।
लेखकलाई नगद रु ९ हजार ९ सय ९९ र ताम्रपत्रसहित पुरस्कृत गर्न सुरु गरेको यो पहिलो वर्ष हो ।

इजरायलका दुई लाख ५० हजारभन्दा बढी मानिसलाई कोरोना भाइरस विरुद्धको चौथो खोप दिइएको छ । कोरोना विरुद्ध चौथो मात्रा खोप दिने इजराइल विश्वमै पहिलो मुलुक हो । कोरोना भाइरसका नयाँ नयाँ भेरियन्टहरू देखिँदै थप तीव्रताका साथ फैलिन थालेपछि अतिरिक्त खोप लगाउने क्रममा इजरायलमा चौथो खोप लगाउन थालिएको हो ।
अतिरिक्त खोप लगाएकालाई कोरोना लागे पनि कम असर गर्ने अध्ययनबाट पुष्टि भएकाले विभिन्न देशहरूले अतिरिक्त खोप लगाउने अभियान सुरु गरेका छन् । केही दिन अगाडि सुरु भएको चौथो खोप लगाउने अभियान अन्तर्गत सुरुमा अग्रपङ्क्तिमा काम गर्ने र ज्येष्ठ नागरिकहरूलाई लगाउने गरिएको छ ।

अमेरिकाको न्युयोर्कमा रहेको एउटा आवासीय अपार्टमेन्टमा आगलागी हुँदा ९ जना बालबालिका सहित १९ जनाको मृत्यु भएको छ । घटनामा ६३ जना घाइते भएका छन् । गभ्भीर अवस्थामा रहेका ३२ जनालाई अस्पताल लगिएको छ ।
न्युयोर्कका मेयर एरिक आदम्सका अनुसार घाइते मध्ये अधिकांशको अवस्था गम्भीर रहेको छ । अग्नी विभागका कमिस्नरका अनुसार घटना १९ तल्ले अपार्टमेन्टको ब्लकमा प्रत्येक तल्लामा लासहरु भेटिएको छ । धुवाँ भवनभरी फैलिएकाले स्थिति तनावपूर्ण रहेको बताइएको छ ।

भारतमा संसद्मा कार्यरत ४०० भन्दा बढी कर्मचारीमा कोभिड-१९ को संक्रमण पुष्टि भएको स्थानीय सञ्चार माध्यमहरुले जनाएका छन् । अधिकारीहरूका अनुसार कर्मचारीहरूलाई मङ्गलबारदेखि शनिबारसम्म गरिएको परीक्षणको क्रममा सङ्क्रमण पुष्टि भएको हो । उनीहरु संसद्को बजेट अधिवेशनअघि नै संक्रमित भेटिएका हुन् ।
एक स्थानीय समाचार एजेन्सीले जनाएअनुसार १,४०९ संसद् कर्मचारी मध्ये ४०२ जनामा सङ्क्रमण पुष्टि भएको हो । ती सबै नमूनाहरू ओमिक्रोन भेरियन्ट कन्फर्मेसनको लागि जीन सिक्वेन्सिङमा पठाइएको छ । संसद्का कर्मचारीको आन्तरिक सन्देशमा कर्मचारीलाई सरकारको निर्देशनअनुसार सावधानी अपनाउन सुझाव दिइएको प्रतिवेदनमा उल्लेख छ ।