Category: विद्यालय समाचार

गोकर्णेश्वर नगरपालिकाको सहयोगमा रमेश विकल साहित्य प्रतिष्ठानद्वारा आज आयोजित स्थलगत कथा, कविता र निबन्ध लेखन प्रतियोगितामा प्रमुख अतिथि काठमाडौं निर्वाचन क्षेत्र नम्बर ३ का प्रतिनिधि सदस्य माननीय सन्तोष चालिसेले पुरस्कृत पन्ध्रजना छात्रछात्रालाई प्रमाणपत्र प्रदान गर्नुभयो ।
उक्त अवसरमा विशिष्ट अतिथि गोकर्णेश्वर नगरपालिकाका प्रमुख दीपक रिसालले पुष्पगुच्छा तथा कार्यक्रमका सभापति वरिष्ठ साहित्यकार रोचक घिमिरेले नगद पुरस्कार प्रदान गर्नुभएको थियो ।

रातो बंगला स्कुल र रातो बंगला किताबले आयोजना गर्दै आएकाे बालसाहित्य महोत्सव यस वर्ष यही फागुन २० गते आयोजना गरिने भएकाे छ । याे महाेत्सव सन् २०१५ देखि आयोजना गर्न शुरु गरिएको हो । रातो बंगला स्कुलको प्राङ्गणभित्र आयोजना गरिने यस महोत्सवमा भाग लिन चाहने दर्शकले जनाही रु. २०० रुपियाँ शुल्क तिर्नुपर्ने महोत्सवका संयोजक मोनिता गुरुङले बताउनुभएको छ ।

विभिन्न क्षेत्र र समुदायका विविध भेषभूषामा सजिएका बालबालिकाहरुकाे प्रस्तुति हेर्दा लाग्थ्याे हिजाे फागुन १३ गते शनिवार रिजेन्ट स्कुलकाे उत्सवमा पूरै नेपाल देश सजिएकाे थियाे । नेपाल देशकाे सांस्कृतिक पहिचान बोलिरहेको थियाे । हो, यो भिडियो तिनै विविधता भित्र समेटिएकाे नेपाली एकताको साक्षी हो । जहाँ बालबालिकाहरुले फरकफरक भेषभूषामा फरकफरक विविध स्वादका नृत्यहरु प्रस्तुत गर्नुभएको थियाे ।

ललितपुर नख्खुदोबाटोस्थित सुदेशा स्कुलमा ‘सम्पदा दर्शन’ भाग १ र २ पढाउन सुरु गरिएको छ । ‘सम्पदा दर्शन’ लेखक सुशीला देउजाद्वारा लिखित चर्चित बालनियात्राकृति हो । ‘सम्पदा दर्शन’ भाग १ मा विश्वसम्पदा सूचीमा रहेका नेपालका सम्पदा क्षेत्रहरु र भाग २ मा सात प्रदेशका सात वटा सम्पदा क्षेत्रहरु भ्रमणको अनुभूति समेटिएको छ ।
सरल भाषा र संवादमय रोचक शैलीमा तयार गरिएका यी दुवै कृति कक्षा ५ र ६ मा अध्ययनरत बालबालिकाहरुका लागि सन्दर्भ पाठ्यसामग्रीका रुपमा छनोट गरी पढाउन सुरु गरिएकाे प्रिन्सिपल वीरङ्गना महर्जनले बताउनुभयो ।