Category: समाचार

कोभिड–१९ महामारीको जोखिमलाई दृष्टिगत गर्दै सरकारले आन्तरिक हवाई उडानका यात्रुलाई अनिवार्य खोप कार्डको व्यवस्था गरेको छ । कोभिड–१९ सङ्कट व्यवस्थापन समन्वय केन्द्र (सिसिएमसी) को हिजो बसेको बैठकले माघ ३ गतेदेखि आन्तरिक हवाई उडानमा खोप कार्ड हुने यात्रुलाई मात्र बोर्डिङ पास उपलब्ध गराउने व्यवस्था मिलाउने निर्णय गरेको हो ।
हवाई उडानका लागि विमानस्थल पुग्ने यात्रुले अनिवार्य खोप कार्ड देखाउनुपर्ने निर्णय भएको सिसिएमसीका प्रवक्ता एवम् सहसचिव सुनिता नेपालले जानकारी दिनुभयो । आन्तरिक तथा अन्तर्राष्ट्रिय उडानमा यात्रुको भीडभाड कम हुने गरी उडान तालिका मिलाउन पनि सिसिएमसीले संस्कृति, पर्यटन तथा नागरिक उड्डयन मन्त्रालयलाई आग्रह गरेको छ ।

हिमपातले नाम्खा गाउँपालिकाको मलिमी, मुचुलगायतका क्षेत्रमा चार फिट हिउँ जमेको तुमकोटका स्थानीयवासी छपाल लामाले जानकारी दिनुभयो । उहाँले भन्नुभयो “यस वर्षकै ठूलो हिमपात भयो । घरभन्दा बाहिर निस्कन सकिएको छैन । चिसोले खानेपानीका धारा तथा खोलाका पानी समेत जमेका छन् ।” अत्यधिक चिसो र हिमपात भइरहेका कारण सिमकोट सुनसान भएका छन् । निरन्तर हिउँसँगैको अत्यधिक चिसोले सिमकोट आसपासको जनजीवन प्रभावित बनाएको सहायक प्रमुख जिल्ला अधिकारी दशरथ राईले जानकारी दिनुभयो ।

विश्वभरि नै कोरोना भाइरसको संक्रमण फेरि बढ्न थालेको छ । गत सातासम्म युरोप र अमेरिकामा सीमित रहेको संक्रमणको ग्राफ एसियाली र अफ्रिकी मुलुकहरुमा उकालो लागेको छ । कोरोना संक्रमणबाट सबैभन्दा प्रभावित अमेरिका रहेको छ । अमेरिकामा पछिल्लो २४ घन्टामा मात्रै ७ लाख २६ हजारभन्दा बढी नयाँ संक्रमित थपिएका छन् ।
केही दिन अघि अमेरिकामा एकै दिनमा १० लाखभन्दा बढी नयाँ संक्रमित थपिएका थिए । संक्रमण मात्रै होइन अमेरिकामा कोरोनाका कारण हुने मृत्युदर पनि उच्च छ । अमेरिकामा एकै दिनमा १६ सयभन्दा बढीको मृत्यु भएको छ । अन्य बढी प्रभावित मुलुकहरुमा युरोपका फ्रान्स, बेलायत, इटाली, स्पेन लगायतका मुलुक रहेका छन् ।

इटालीबाट भारत आएका दुई वटा विमानका यात्रुहरुमा अधिकांशमा कोरोना संक्रमण पुष्टि भएको भारतीय अधिकारीहरुले बताएका छन् । इटालीको रोमबाट भारतको अमृतसर आएको विमानमा रहेका कुल २ सय ८५ यात्रु मध्ये १ सय ७३ जनामा कोरोना संक्रमण पुष्टि भएको हो । यसै गरी इटालीकै मिलानबाट अर्को दिन अमृतसर नै आएको विमानमा १ सय जनामा संक्रमण पुष्टि भएको छ ।

भारतमा विदेशबाट आएका सबैले सात दिन होम क्वारेन्टाइनमा अनिवार्य बस्नुपर्ने व्यवस्था गरिएको छ । भारतको संघीय स्वास्थ्य मन्त्रालयले शुक्रबार सूचना जारी गर्दै विदेशबाट आएका सबै यात्रुलाई कम्तीमा सात दिन होम क्वारेन्टाइनमा बस्न आग्रह गरेको हो ।

रुकुम (पूर्व)को सिस्ने गाउँपालिका–१ मा पाखा ओराली लघुजलविद्युत् आयोजनाको काम रोकिएको छ । हिमपातका कारण उक्त लघुजलविद्युत् आयोजनाको काम रोकिएको हो । यही माघसम्म काम सम्पन्न गरिसक्नुपर्ने उक्त विद्युत् आयोजनाको काम हिमपातका कारण धकेलिने भएको छ ।

भारतबाट नेपाल भित्रिने नागरिकमा कोरोना भाइरस सङ्क्रमण पुष्टि हुन थालेपछि सुदूरपश्चिम प्रदेशमा कोरोनाको जोखिम थप बढेको छ । भारतमा कोरोनाको नयाँ भेरियन्ट ‘ओमिक्रोन’ तीव्र रुपमा फैलिएसँगै त्यसको जोखिम सुदूरपश्चिम प्रदेशमा पनि बढेको छ । विद्यालयमा सामाजिक दूरी कायम राख्ने र स्वास्थ्य सुरक्षाका मापदण्ड अपनाउने विषयमा त्यति चासो राखिएको देखिँदैन । धेरै नागरिक विना मास्क हिँडिरहेका देखिन्छन् ।