Category: अन्तर्राष्टिय

युक्रेनविरुद्ध युद्ध गरिरहेको रुसले फेसबुक माथि प्रतिबन्ध लगाएको छ । रुसको संचार सम्बन्धी नियमनकारी निकायले रुसी मिडिया माथि लगाइएको प्रतिबन्धको प्रतिक्रियाका रुपमा फेसबुक माथि प्रतिबन्ध लगाइएको जनाइएको छ । सन् २०२० को अक्टोबर देखि नै फेसबुकले रुसी मिडिया माथि २६ प्रकारका विभेद गरेकाले प्रतिबन्ध लगाइएको जनाइएको छ । अब रुसमा फेसबुक हेर्न नपाइने भएकाे छ ।
सन् २०२० को अक्टोबर देखि नै फेसबुकले रुसी मिडिया माथि २६ प्रकारका विभेद गरेकाले प्रतिबन्ध लगाइएको हाे ।

भियतनाममा कोरोना भाइरसबाट दैनिक सङ्क्रमित हुनेको सङ्ख्या अहिलेसम्मकै सबैभन्दा धेरै भएको छ । भियतनामका अधिकारीहरुले दिएको जानकारी अनुसार पछिल्लो २४ घण्टामा एक लाख १८ हजार ७९० जना कोरोना भाइरसबाट सङ्क्रमित भएका छन् । यो सङ्ख्या अघिल्लो दिनको भन्दा आठ हजार ४८९ ले बढी हो । देशभरिका ६२ ठाउँमा ती सङ्क्रमितहरू भेटिएका हुन् । ती मध्ये राजधानी हनोइमा मात्रै १८ हजार ६६१ जना भेटिएको मन्त्रालयले जनाएको छ ।

युक्रेनमा रुसको सैन्य कारबाही सुरु गरेको सात दिनको अवधिमा करिब १० लाख शरणार्थीले युक्रेन छोडेको संयुक्त राष्ट्र संघीय शरणार्थी एजेन्सी (UNHCR) ले जनाएको छ । आफ्नो ट्विटर ह्यान्डलमा UNHCR उच्चायुक्त फिलिपो ग्रान्डीले लेखेका छन् केवल सात दिनमा युक्रेनबाट छिमेकी देशहरूमा १० लाख शरणार्थीहरू पलायन बताउनु भएको छ ।  रुसी राष्ट्रपति भ्लादिमिर पुटिनले युक्रेनको डोनबास क्षेत्रमा सैन्य कारबाही गर्न आदेश दिएको आठ दिन बितिसकेको छ।

रुस र युक्रेन बिच युद्ध सुरु भएको पाँचौ दिनमा हिजो भएको वार्ता निष्कर्षमा नपुगेपछि रुसले आक्रमण कायमै राखेको छ । रुसी बख्तरबन्द गाडीहरूको करिब ४० माइल लामो लस्कर युक्रेनी राजधानी कीभतर्फ बढ्दै गरेको भूउपग्रह तस्वीरहरु सार्वजनिक भएका छन् । राजधानी किभमा फेरि रुसले हवाई आक्रमण गर्ने तयारी गरिरहेको खबर सहित शहरको बाहिरी भागमा साइरनहरु बज्न थालेकाले स्थिति थप नाजुक बनेको छ ।

जापानले बेलारुसका राष्ट्रपति अलेक्जेन्डर लुकासेन्को र रुस माथि प्रतिबन्ध लगाउने घोषणा गरेको हो । मस्कोले युक्रेनमा गरेको आक्रमणलाई लिएर रुसको केन्द्रीय बैंकसँगको व्यापार सीमित गर्ने जापानी प्रधानमन्त्री फुमियो किशिदाले बताउनु भएको छ । युक्रेन माथि गरिएको आक्रमणमा बेलारुसको स्पष्ट संलग्नता देखिएकाले राष्ट्रपति लुकासेन्को, अन्य व्यक्ति तथा संस्थाहरू र निर्यात नियन्त्रण उपायहरू विरुद्ध प्रतिबन्ध लगाउने प्रधानमन्त्री किशिदाले बताउनु भएको हो ।

रुसी राष्ट्रपति भ्लादिमिर पुटिनले युक्रेनको डनबास क्षेत्रमा सैन्य कारवाहीको घोषणा गर्नुभएको छ । राष्ट्रपति पुटिनले युक्रेनी सेनालाई पूर्वी युक्रेनको युद्धग्रस्त क्षेत्रबाट हतियार विसाएर घर फर्कन पनि आग्रह गर्नुभएको छ । युक्रेनका राष्ट्रपति भोलोदिमेर जेलेनेस्कीले अहिले गरिएको आक्रमण युरोपेली महाद्धीपकै लागि ठूलो युद्धको सुरुवात भएको प्रतिक्रिया दिनुभएको छ । युद्धको त्रास बढेसँगै यसअघि नै युक्रेनले ३० दिने संकटकालको घोषणाको छ । मध्यराति राष्ट्रका नाममा संवोधन गर्दै युक्रेनी राष्ट्रपति जेलेनेस्कीले रुसको रुसी आक्रमणको डटेर सामना गर्ने बताउनु भएको छ ।

बेलायतमा कोभिड रोकथामका लागि लगाएका सबै प्रतिबन्ध बिहीबारदेखि हटाइएको छ ।  बेलायती प्रधानमन्त्री बोरिस जोन्सनले आजैदेखि लागू हुने गरी कोरोनासँग सम्बन्धित सबै प्रतिबन्ध हटाउने बताउनु भएको हो । बेलायतले जनवरी देखि नै अनिवार्य मास्क लगाउने र सङ्क्रमण नियन्त्रणका लागि अपनाइएका कडा खालका प्रतिबन्धात्मक उपायहरूलाई अन्त्य गरिसकेको थियो ।
प्रधानमन्त्री बोरिस जोन्सनले गरेको नयाँ घोषणापछि बिहीबार देखि नै विद्यालय, कलेज तथा बाल हेरचाह संस्थाका कर्मचारीले हप्तामा दुईपटक कोरोना परीक्षण गराउनु पर्ने यस पहिलेको प्रावधान हट्ने छ भने कसैलाई कोभिड पुष्टि भएको भएपनि छुट्टै (एकान्त) मा बस्नु पर्ने छैन ।

दक्षिण कोरियामा जन्मदर घटेको छ । यसअघि ०.८४ प्रतिशत जन्मदर रहेकोमा अहिले घटेर ०.८१ भएको दक्षिण कोरियाको तथ्याङ्क कार्यालयले जनाएको छ । यो जन्मदर सन् १९७० पछिकै सवैभन्दा कम भएको पनि सरकारी अधिकारीहरुले जनाएका छन् । जन्मदर क्रमश घट्दै गइरहेको तथ्याङ्कमा देखिएको छ । सन् २०२१ भरीमा दक्षिण कोरियामा झण्डै दुई लाख ६० हजार ५ सय बालबालिका जन्मिएको सरकारी अधिकारीहरुले जानकारी दिएका छन् । ढिलो विवाह गर्ने र थोरै सन्तान जन्माउने प्रवृत्ति बढ्दै गएकोले जन्मदर पनि घट्दै गइरहेको विश्लेषण गरिएको छ ।