बेलायतमा कोरोना संक्रमण यस वर्षकै उच्च

अन्तर्राष्टिय समाचार

विश्व समाचार :

खोपको प्रभावकारिताका विषयमा अध्ययन र विश्लेषण भइरहँदा बेलायतमा भने कोरोना संक्रमण निरन्तर रुपमा बढिहरेको छ । पछिल्लो २४ घन्टामा मात्रै ५८ हजारभन्दा बढी नयाँ संक्रमित थपिएका छन् । यो संख्या गत जनवरी ९ यताकै सबैभन्दा बढी हो ।

बेलायतमा ओमिक्रोनबाट संक्रमित हुनेको संख्या पनि बढ्दो क्रममा छ । बितेको २४ घन्टामा मात्रै ४ सय ४८ जना ओमिक्रोन संक्रमित थपिएका छन् । हालसम्म ओमिक्रोन संक्रमित हुनेको संख्या १ हजार २ सय ६५ पुगेको छ । बढ्दो संक्रमणको जोखिम कम गर्न बेलायतले सार्वजनिक स्थलमा मास्कको प्रयोग अनिवार्य गरिसकेको छ । नाइट क्लब लगायतका भीडभाड हुने स्थानमा जान कोभिड पासको व्यवस्था गरिने भएको छ । साथै आगन्तुकहरुलाई केयर होम लगायतका स्थानमा प्रवेश गर्न कडाई गरिने भएको छ ।

बेलायतका वैज्ञानिकहरुले हालै भेटिएको कोरोनाको नयाँ भेरिन्ट ओमिक्रोन संक्रमणबाट जोगिन कोरोना विरुद्ध बनेका दुई डोज खोप पर्याप्त नहुने भन्दै सचेत गराएका छन् । प्रारम्भिक अध्ययनले कोरोनाका ओमिक्रोन र डेल्टा भेरियन्ट विरुद्ध खोप खासै प्रभावकारी नभएको पाइयो । तर बुस्टरका रुपमा दिइएको तेस्रो डोज खोपपछि भने ७५ प्रतिशत प्रभावकारी भएको अध्ययनबाट देखिएको छ ।

Leave a Reply

Your email address will not be published.