काठमाडौं, फागुन २८/ ब्राइट फ्युचर स्कुल (नैकाप, काठमाडाैँ) का प्रतिभाशाली बालगायक प्रसुन जंग पोखरेलले जर्जीयाको राजधानी तिबिलिसीमा हालै सम्पन्न वर्ल्ड राइजिङ स्टार- २०२३ प्रतियोगितामा वर्ल्ड राइजिङ स्टारको उपाधि जित्न सफल हुनुभएकाे छ ।
नेपालबाट प्रतिनिधित्व गर्दै उक्त प्रतियोगितामा सहभागी हुनुभएकाे पोखरेलले राष्ट्रिय पोसाक टाइटल पुरस्कार पनि जित्नुभएकाे थियाे ।
उक्त प्रतियोगितामा विजयी भएर स्वदेश फर्किनुभएका पोखरेललाई शनिबार शितल निवासमा आयोजित एक भव्य कार्यक्रममा राष्ट्रपति विद्यादेवी भण्डारीले विश्वमा नेपालको नाम चिनाउने काम गरेकोमा बधाई ज्ञापन गर्दै शुभकामनासहित अवार्ड हस्तान्तरण गर्नुभयाे ।
कार्यक्रममा ब्राइट फ्युचर सेकेण्डरी स्कुलका निर्देशक मोहन कार्की, मिस मंगोल २०१८ जाङ्मु इन शेर्पा तथा परिवर्तन इभेन्ट हाउसका निर्देशक राज बराइलीको सहभागिता रहेको थियो ।
थाइल्यान्डमा आयोजित टीन स्टार इन्टरनेशनल २०२२ प्रतियोगितामा फोर्थ रनर्स अप हुनुभएका पोखरेल ब्राइट फ्युचर सेकेण्डरी स्कुलमा कक्षा ९ मा अध्ययनरत हुनुहुन्छ ।
विलक्षण बालप्रतिभा प्नसुन डीएसए सिंगिङ स्टार २०१९ का विजेता पनि हुनुहुन्छ । परिवर्तन इभेन्ट हाउसद्वारा राजधानीमा आयोजित नृत्य, गायन र अभिनय सम्बन्धी प्रतिस्पर्धा डी एस ए स्टार २०१९ मा विजेता भएपछि नेपालको प्रतिनिधित्व गर्दै पोखरेल जर्जीया पुग्ने अवसर पाउनु भएकाे थियाे । त्यहाँ उहाँले ४२ देशका प्रतिस्पर्धिहरुसँग प्रतिस्पर्धा गरी याे पुरस्कार जित्नुभएकाे हाे ।
