काठमाडौँ, असार २३ गते
भाइबहिनीहरु, नानीका कवि कृष्णप्रसाद पराजुलीको स्मृतिमा स्थापित ‘रमाइला नानी बालसाहित्य पुरस्कार’ आज एक विशेष समारोहबिच चर्चित बालसाहित्य लेखक रामबाबु सुवेदीलाई प्रदान गरिएको छ ।
कमलादी, काठमाडौँमा रहेको युनिग्लोब विद्यालयमा नानीका कवि कृष्णप्रसाद पराजुलीको ८८ औं जन्मजयन्तीका अवसरमा आयोजित आजको कार्यक्रममा समारोहका प्रमुख अतिथि वरिष्ठ लेखक एवम् वातावरणविद् डा. तीर्थबहादुर श्रेष्ठले १० हजार नगद र प्रमाणपत्रसहित कवि सुवेदीलाई पुरस्कार अर्पण गर्नुभयो ।
कृष्ण साहित्य सदनका संरक्षक साहित्यकार शास्वत पराजुलीले स्वागत गर्नुभएको कार्यक्रममा नानीका कवि पराजुलीको ‘मनमाया’ महाकाव्यमा शोध गरी स्नातकोत्तर तहमा सर्वप्रथम हुन सफल शोधार्थी डिल्ली नेपाललाई पनि सम्मान गरिएको थियो ।
वरिष्ठ साहित्यकार एवम् समालोचक प्रा.डा. कपिलदेव लामिछानेले पुरस्कृत र सम्मानित व्यक्तित्वहरु क्रमश: रामबाबु सुवेदी र डिल्ली नेपालको बारेमा बोल्नुभएको थियो । मन्तव्यका क्रममा उहाँले रामबाबु सुवेदी नेपाली बालगीतकारका रुपमा चर्चित लेखक हुनुहुन्छ भन्नुभयो ।
नेपाली बालसाहित्यका क्षेत्रमा विगत ५ दशकदेखि निरन्तर योगदान दिनुभएकाले वरिष्ठ साहित्यकार कवि रामबाबु सुवेदीलाई पुरस्कृत गरिएको कृष्ण साहित्य सदन नेपालका संरक्षक शास्वत पराजुलीले बताउनुभएको छ ।
रामबाबु सुवेदी मेरो गाउँ ज्यामिरे जामुनीको छोरो म, आइतबार बिहानै घामसित उठेँ म लगायत दर्जनौं गीतका लेखक हुनुहुन्छ । उहाँका गीतहरु अनलाइनमा थ्रिडी एनिमेसनमा पनि हेर्नसकिन्छ । उहाँको युट्युब च्यानलको नाम रामबाबु सुवेदी अफिसियल हो ।
