Category: अन्तर्राष्टिय

एक दर्जनभन्दा बढी मुलुकहरुले आफ्ना नागरिकलाई तत्काल युक्रेन छोड्न आग्रह गरेका छन् । रुसले युक्रेन माथि कुनै पनि बेला आक्रमण गर्न सक्ने पश्चिमा शक्तिहरुको चेतावनीपछि कयौं मुलुकले आफ्ना नागरिकलाई युक्रेन छोड्न दवाब दिएका हुन् । अमेरिका, बेलायत र जर्मनीले यस अघि नै आफ्ना नागरिकलाई युक्रेन छोड्न आग्रह गरिसकेका छन् । रुसले युक्रेनको सीमा नजिकै १ लाखभन्दा बढी सैना तैनाथ राखेको छ ।

फ्रान्समा कोरोना महामारी नियन्त्रणका लागि लागू गरिएको प्रतिबन्धात्मक व्यवस्थाको विरोधमा व्यापक प्रदर्शन भएको छ । प्रतिबन्धको विरोधका लागि राजधानी पेरिस जाने प्रयास गरिरहेका हजारौं सवारी साधनहरु माथि प्रहरीले हस्तक्षेप गरेको छ । कोरोना नियन्त्रणका लागि लगाइएको प्रतिबन्धलाई स्वतन्त्रताको हनन् भन्दै विरोधमा उत्रिएकाहरु माथि प्रहरीले अश्रु ग्यास प्रहार गरेको छ । आन्तरिक मामिला मन्त्री गेराल्ड डरमानिनले प्रदर्शनमा सहभागी ५४ जनालाई गिरफ्तार गरिएको छ ।

युक्रेनले आफ्नो मुलुकलाई रुसले समुद्रको पहुँचमा रोक लगाएको आरोप लगाएको छ । रुसले आगामी साताका लागि तय गरेको नौसेना अभ्यासका लागि युक्रेनलाई समुद्र माथिको पहुँचमा रोक लगाएको आरोप छ । युक्रेनी विदेशमन्त्री दिमित्रो कुलेबाले अजोभ सागर पूर्ण रूपमा अवरुद्ध गरिएको र ब्ल्याक सीलाई रुसी सेनाले लगभग पूर्ण रूपमा ढाकेको बताउनु भयो ।
रुसले बारम्बार युक्रेनमाथि आक्रमण गर्ने कुनै योजना नरहेको जनाउँदै आएको छ । तर युक्रेनको सीमानामा १ लाखभन्दा बढी सैनिक तैनाथ राखेको छ ।

युरोपेली मुलुक जर्मनीमा कोरोना भाइरसको संक्रमण अहिले विश्वमै सबैभन्दा उच्च छ । जर्मनीमा पछिल्लो २४ घन्टामा २ लाख ४७ हजारभन्दा बढी नयाँ संक्रमित थपिएका छन् । विश्वमै उच्च संक्रमण रहेका अमेरिका, फ्रान्स, रुस जस्ता मुलुकमा अहिले संक्रमण २ लाखभन्दा निकै तल झरेको छ । अन्य युरोपेली मुलुकमा संक्रमण उच्च भएका बेला पनि संक्रमण निकै तल रहेको जर्मनीमा ‌ओमिक्रोन संक्रमणले व्यापक रुपमा फैलाएको छ । कोरोना विरुद्धको खोप लगाउन नागरिकहरुले आनाकानी गर्नु र स्वास्थ्य सावधानीका मापदण्डको पालना नगर्दा जर्मनीमा संक्रमण उच्च भएको छ ।

बेलायती प्रधानमन्त्री बोरिस जोनसनले यसअघि तोकिएको समयभन्दा पनि अगाडि नै बेलायतमा कोरोनाका विरुद्धमा लगाइएको प्रतिबन्ध हटाउने बताउनु भएको छ । संक्रमण उल्लेख्य मात्रामा घटेपछि बेलायती प्रधानमन्त्री जोनसनले सो घोषणा गर्नुभएको हो । बेलायतमा आगामी मार्च २४ सम्मका लागि कोरोना भाइरस विरुद्ध प्रतिबन्धहरु लगाइएको छ । तर त्यस अगाडि नै सबै प्रकारका प्रतिबन्धहरुलाई फुकुवा गर्ने तयारी सरकारले थालिसकेको छ ।

अफगानिस्तानमा बालबालिकाहरुका लागि तत्काल ठुलो सहयोग नगरे दस लाख बालबालिकाको मृत्यु हुनसक्ने दावी गरिएको छ । संयुक्त राष्ट्रसंघ अन्तर्गतको राष्ट्रसंघीय बालकोष (यूनिसेफ) ले त्यहाँका बालबालिकाको जीवन खतरापूर्ण अवस्थामा रहेको चेतावनी दिएको हो । यूनिसेफले बालबालिकाको अवस्थाप्रति गम्भीर चिन्ता व्यक्त गर्दै विश्व समुदायले तत्काल सहयोग गर्नुपर्नेमा जोड दिएको छ ।
विषेश गरेर आधारभूत खाद्य सेवासमेत नभएकाले बालबालिकाहरुलाइ कुपोषण भएकाे छ ।

जर्मनीको ग्यास भण्डारण ‘चिन्ताजनक’ अवस्थामा झरेको जर्मनीले जानकारी गराएको छ । रुसले युक्रेनमाथि आक्रमण गर्न सक्ने आशङ्काले ऊर्जा आपूर्तिमा थप दबाब परेको जर्मनीको अर्थ मन्त्रालयकी प्रवक्ताले बुधबार बताउनु भएको हो । उहाँले सरकारको नियमित पत्रकार सम्मेलनमा प्राकृतिक ग्यास भण्डारण अहिले ३५–३६ प्रतिशत रहेको छ । अर्थ मन्त्रालयकी प्रवक्ताले भण्डारण तहको अवस्थाको अनुगमन गरिरहेका जनाउँदै चिन्ताजनक रहेको बताउनु भएको छ ।

युरोपेली संघका लागि रुसी राजदूत भ्लादिमिर चिजहोभले रुस अझै पनि कुटनीतिक पहलमा युक्रेनको द्वन्द समाधान गर्ने पक्षमा रहेको बताउनु भएको छ । बिबिसीसँगको कुराकानीमा रुसी राजदूत चिजहोभले मस्कोको कसै माथि पनि आक्रमण गर्ने मनसाय नरहेको स्पष्ट पार्दै युद्धका लागि बारम्बार उक्साएमा सोच परिवर्तन हुनसक्ने भन्दै चेतावनी समेत दिनुभयो । युक्रेनका विषयमा गत सोमबार र मंगलबार भएका कुटनीतिक गतिविधिपछि रुसको यस्तो भनाइ आएको हो ।

स्पेनका राजा फिलिप छैठौंलाई कोभिड–१९ सङ्क्रमण पुष्टि भएको स्पेनी दरबार स्रोतले जानकारी गराएको छ । उहाँलाई कोभिड सङ्क्रमण पुष्टि भए पनि सामान्य लक्षणहरू मात्र महशुस भएको बताइएको छ । सङ्क्रमणका हल्का लक्षणहरू देखिएपछि ५४–वर्षीय राजाले मङ्गलबार कोभिड सङ्क्रमण परीक्षण गराउनुभएको थियो । उहाँ एक हप्तासम्म अलग्गै बस्नुहुने र यस अवधिमा आफ्नो आवासबाट ‘आफ्ना संस्थागत क्रियाकलापहरू’ गर्नुहुने बताइएको छ ।
स्पेनी नरेशले बुधबार नै म्याड्रिडमा बोस्नियाली राष्ट्रपतिका क्रोएसियाली प्रतिनिधि जेल्ज्को कोमसिकसँग भेटवार्ता गर्नुभएको थियो । राजा फिलिपले २०२१ मे महिनामा कोभिड–१९ विरूद्धको पहिलो मात्रा खोप लगाउनुभएको दरबारका अधिकारीले बताएका छन् ।

कोलम्बियामा भारी वर्षापछि गएको पहिरोमा परी १४ जनाको मृत्यु/३५ जना घाइते, एक जना बेपत्ता/पहिरो नरोकिएकाले सुरक्षित स्थानमा रहन नागरिकहरुलाई चेतावनी ।
कोलम्वियाको आवासीय क्षेत्रमा हिजो परेको भारी वर्षापछि पहिरो खस्दा १४ जनाको मृत्यु भएको छ । घटनामा ३५ जनाभन्दा बढी घाइते छन् भने एक जना बेपत्ता रहेको अधिकारीहरुले जनाएका छन् । पहिरोका कारण पेरिरा नगरपालिकाको रिसरल्दा क्षेत्र बढी प्रभावित भएको छ ।