Category: अन्तर्राष्टिय

फ्रान्सले खोप लगाएका युरोपेली संघ बाहिरका यात्रुका लागि चाँडै नै कोभिड सङ्क्रमण भएको वा नभएको परीक्षण गर्नुपर्ने प्रावधानलाई छिट्टै हटाउने भएको छ । दैनिक रुपमा संक्रमणको संख्या घट्दै गएपछि फ्रान्सले यस प्रावधानलाई क्रमशः खुकुलो पार्दै हटाउन लागेको युरोप मामिला मन्त्री क्लेमेन्ट बेउनले बताउनुभएको हो ।

सोमालियामा लामो समयदेखि खडेरी लागेका कारण खाद्यान्नको ठूलो संकट भएको छ । भोकमरीका कारण ठूलो संख्यामा नागरिकहरु प्रभावित भएको संयुक्त राष्ट्रसंघले जनाएको छ । संयुक्त राष्ट्रसंघले पछिल्लो समयमा भोकमरीका कारण कम्तीमा पनि ४३ लाख मानिस प्रभावित भएको जनाएको हो । यहाँ अघिल्लो महिनामा नै ३२ लाख मानिसलाई भोकमरीले छोएको र यो महिना अरु मानिस थपिएको राष्ट्रसंघले जनाएको छ ।

भारतमा कोरोना भाइरस विरुद्धको खोप अभियान तीव्र गतिमा अघि बढेको छ ।  भारतका १५ देखि १८ वर्षसम्मका पाँच करोडभन्दा बढी युवाले कोरोना भाइरस विरुद्धको पहिलो खोप लगाएका छन् । ठुलो मात्रामा खोप लगाएकाहरुको सङ्ख्या देखिएकाले पछिल्ला दिनमा कोरोना भाइरस विरुद्धको लडाई सहज हुने अधिकारीहरूले बताएका छन् । खोप लगाउन बाँकी रहेका अन्य व्यक्तिलाई समेत छिट्टै खोप लगाउन अनुरोध गरिएको छ ।

विश्वभरि नै कोरोना भाइरसको संक्रमण दर घटेको छ । उच्च संक्रमण दर रहेका अमेरिका, बेलायत, फ्रान्स, जर्मनी, इटाली, स्पेन र भारतमा पनि उल्लेख्य रुपमा संक्रमण घटेको छ । दुई साता अघि सम्म ७ लाखसम्म पुगेको अमेरिकाको कोरोना संक्रमण दर घटेर अहिले ९१ हजारमा झरेको छ । केही दिन अघिसम्म तीन लाख नजिक पुगेको भारतको संक्रमण दर पनि १ लाखमा झरेको छ ।
फ्रान्समा पछिल्लो २४ घन्टामा २ लाख १५ हजारको हाराहारीमा नयाँ संक्रमित थपिएका छन् । केही दिन अघिको तुलनामा फ्रान्समा पनि संक्रमण घटेको हो ।

मोरक्कोमा इनारमा खसेका ५ वर्षीय बालकको मृत्यु भएको छ । ३२ मिटर लामो साँघुरो इनारमा खसेका रायन नाम गरेका ती बालकको जीवितै उद्दारका लागि सरकारले चारदिन निरन्तर प्रयास गरेको थियो । तर उद्दारको दुःखद अन्त्य भएको छ । बालकलाई इनारबाट निकाल्दा घटनास्थलमा खुसीले चिच्याएको ठूलो भीड जब बालकको मृत्यु भइसकेको खबर बाहिरियो शोकमा बदलिएको थियो । बालकलाई उद्दारकर्ताहरुले शनिबार साँझ इनारबाट निकालेका थिए ।
बालकलाई इनारबाट निकाल्नु अघि घटना स्थलमा ठुलो भीड जम्मा भएको थियो ।

संयुक्त राष्ट्रसंघीय सुरक्षा परिषदमा उत्तर कोरियाले हालै गरेको ब्यालेस्टिक क्षेप्यास्त्र परीक्षणका विषयमा छलफल गरिएको छ । गत आइतबार उत्तर कोरियाले सो क्षेप्यास्त्र परीक्षण गरेको हो । सुरक्षा परिषद्का केही सदस्यहरुले उत्तर कोरिया माथि लगातार क्षेप्यास्त्र परीक्षण गरेकोभन्दै कारवाही गर्नुपर्ने माग गरेका छन् । पछिल्लो पटक परीक्षण गरिएको क्षेप्यास्त्र अमेरिकाको सीमा सम्ममा निसाना लगाउन सक्ने क्षमताको रहेको बताइएको छ ।

छिमेकी देश चीनमा बेइजिङ शीतकालीन ओलम्पिकको उद्घाटन समारोह सुरु भएको छ । खेलाडीहरूको परेड र ओलम्पिक दीप प्रज्वलन लगायत कार्यक्रमलाई १५ खण्डमा विभाजन गरिएको छ । २४औँ हिउँदे ओलम्पिक खेलकुदको उद्घाटन समारोह पैचिङ राष्ट्रिय स्टुटियोमा आयोजना भएको हो । चीनका राष्ट्रपति सी चिनफिङ, अन्तर्राष्ट्रिय ओलम्पिक कमिटीका अध्यक्ष थोमास बाच, संयुक्त राष्ट्र संघका महासचिव एन्टोनियो गुटेरेस लगायत अन्तर्राष्ट्रिय संगठनका जिम्मेवार व्यक्ति समारोहमा सरिक हुनुभएको छ ।