Category: समाचार

युक्रेनका राष्ट्रपति भोलोदिमेर जेलेन्स्कीले आफ्नो देशको सिमानामा रुसी सेनाको तैनाथीलाई लिएर नआत्तिन पश्चिमा राष्ट्रहरूलाई आग्रह गर्नुभएको छ । राष्ट्रपति जेलेन्स्कीले पत्रकारहरुहरु कुराकानी गर्दै आक्रमणको चेतावनीले युक्रेनको अर्थतन्त्रलाई जोखिममा पारेको बताउनु भयो । गत विहीबार अमेरिकी राष्ट्रपति जो बाइडनले रुसले अर्को महिना छिमेकी मुलुक युक्रेन माथि आक्रमण गर्न सक्ने बताउनु भएको थियो । रुसले अमेरिकी आरोप अस्वीकार गर्दै युक्रेन माथि आक्रमणको कुनै पनि योजना नरहेको र मस्कोले युद्ध नचाहेको प्रष्टिकरण दिएको छ ।

काठमाडौँ महानगरपालिकामा परीक्षण गर्ने गरेका मध्ये ६० प्रतिशत नागरिकमा कोरोना भाइरस सङ्क्रमण देखिने गरेको बताइएको छ । अहिले महामारी तीव्र रुपमा फैलिएकाले परीक्षण गर्न आउने बढेका र आएका मध्ये ५५ देखि ६० प्रतिशतमा सङ्क्रमण देखिन थालेको कमपाको भनाइ छ । कारोना बढेकालेनै कामपाले अहिले ३२ वटै वडाबाट परीक्षण गरिरहेको छ ।
अहिले परीक्षण दर पनि बढेको छ दैनिक झण्डै एक हजार जना कामपामा मात्रै परीक्षण गर्न आउछन । सङ्क्रमण बढेपनि विगतको समयमा जस्तो जटिल किसिमको बिरामीहरु नआएको र आएपनि तयारी अवस्थामा रहेको कामपा प्रवक्ता ईश्वरमान डङ्गोलले जानकारी दिनुभयो ।

नेपालमा कोरोना विरुद्धको खोप अभियान सञ्चालन भएको एक वर्ष पूरा भएको छ । यो अवधिमा देशमा अठार वर्ष माथिका लक्षित जनसङ्ख्याको ७० प्रतिशत जनसङ्ख्याले पूर्ण मात्रा र ८३ प्रतिशतले एक मात्रा खोप लगाइसकेका छन् । चार करोड २० लाख ८९ हजार ५४० मात्रा खोप विभिन्न विधिबाट प्राप्त भएको र तीमध्ये तीन करोड छ लाख चार हजार १५२ मात्रा प्रयोग भइसकेको मन्त्रालयले जनाएको छ । खोप अभियानले दोस्रो तथा तेस्रो लहरमा हुनसक्ने जोखिमलाई कम गर्न सकिएको छ ।

काठमाडौं उपत्यकामा चल्ने सार्वजनिक यातायातमा जोर-बिजोर प्रणालीलाई हटाइएको छ । उपत्यकाका तीन वटा जिल्ला प्रशासन कार्यालयका प्रमुख जिल्ला अधिकारीहरुको बैठकले सार्वजनिक यातायातमा जोर-बिजोर प्रणाली हटाउने निर्णय गरेको हो ।  अर्को आदेश नआए सम्मको लागि सार्वजनिक यातायातमा यसअघि लगाइएको जोरबिजोर प्रणाली हटाइएको काठमाण्डौका प्रमुख जिल्ला अधिकारी गोविन्द प्रसाद रिजालले जानकारी दिनुभयो । 

दक्षिणी अफ्रिकी क्षेत्र एना नामक आँधीका कारण आएको बाढीको चपेटामा परेको छ । आँधीका कारण आएको बाढीले सो क्षेत्रमा कयौं मानिसको ज्यान जानुका साथै धेरै भौतिक संरचनामा क्षति पुगेको छ । मादागास्करमा आँधीका कारण ४१ जनाको मृत्यु हुनुका साथै १ लाख मानिस घर छोड्न बाध्य भएका छन् । मलावीमा पनि आँधी र बाढीका कारण १९ जनाको मृत्यु भएको छ ।