Category: समाचार

म्याग्दी सदरमुकाम स्थित बेनी अस्पतालमा आइसीयु (सघन उपचारकक्ष)सहितको बालबालिका उपचार कक्ष स्थापना गरिएको छ । गण्डकी प्रदेश सरकारको सहयोगमा पूर्वाधार र उपकरण जुटाएर मंगललबारदेखि सो कक्ष सञ्चालनमा ल्याइएको हो । अस्पताल व्यवस्थापन समितिका अध्यक्ष बेलबहादुर कटुवालले आइसीयुसहित आठ शैया क्षमताको उपचार कक्षमा सेवा सुरु भएको जानकारी दिनुभयो । यसअघि अन्य उमेर समूहकै बिरामीसँगै राखेर बालबालिकाको उपचार हुँदै आएको थियो । बालबालिकाको उपचारलाई प्रभावकारी र व्यवस्थित गर्न तथा हेरचाहमा सहजता लागि सो कक्ष सञ्चालनमा ल्याइएको हो ।

काठमाडौं उपत्यकामा कोरोना संक्रमितको संख्या उच्च गतिमा बढेपछि आजैदेखि पशुपति नाथ मन्दिर प्रवेशमा रोक लगाइएको छ । मन्दिर लगायतका सार्वजनिक स्थलमा भिडभाड हुनेहुँदा संक्रमणको जोखिम बढेको भन्दै सरकारले पशुपति नाथ मन्दिर भक्तजनका लागि बन्द गरेको हो । यसै गरी गोरखाको मनकामना मन्दिरले पनि आगामी शुक्रबारदेखि भक्तजनलाई प्रवेशमा रोक लगाउने भएको छ । देशभर तेस्रो लहरको कोरोना सङ्क्रमण बढ्दै गएपछि सङ्क्रमण फैलन सक्ने जोखिमलाई ख्याल गर्दै मन्दिर प्रवेशमा रोक लगाउने निर्णय गरिएको हो ।

अमेरिका र क्यानडाका केही भागमा उच्च हिमपात सहितको हिमआँधी नै आउन सक्ने भन्दै नागरिकहरुलाई चेतावनी दिइएको छ । बाक्लो हिमपातका कारण अमेरिका र क्यानडाका दक्षिण पूर्वी राज्यहरुमा हजारौं उडानहरु रद्द गरिएका छन् । कयौं घरहरुमा विद्युत सेवा अवरुद्ध भएको छ । अमेरिकाका भर्जिनिया, उत्तरी र दक्षिणी क्यारोलिना राज्यले संकटकालको घोषणा गरेका छन् । हिमपात र हिमआँधीबाट अमेरिकाका पूर्वी राज्यहरु विगत दुई दिनदेखि बढी प्रभावित भएका छन् । हिमपात र हिमआँधीले न्युयोर्क शहर र कनेक्टिकट राज्यका केही भागहरु सडक र अन्य पूर्वाधारमा समेत असर गर्न सक्ने भन्दै सचेत गराइएको छ ।

भारतमा विगत केही दिनदेखि कोरोना संक्रमण उच्च गतिमा बढेको छ । पछिल्लो २४ घन्टामा मात्रै भारतमा २ लाख ५७ हजारभन्दा बढी नयाँ संक्रमित थपिएका छन् । यसै गरी कोरोनाकै कारण दैनिक मृत्यु दरमा पनि वृद्धि भएको छ । संक्रमण दर व्यापक रुपमा बढेपछि विभिन्न राज्यहरुले प्रतिबन्धात्मक व्यवस्थामा कडाई गरेका छन् । राजधानी नयाँ दिल्ली, व्यापारिक राजधानी मुम्बई लगायतका स्थानमा शैक्षिक संस्थाहरु बन्द गरिएका छन् ।

रिब ९० प्रतिशत चिनियाँ नागरिकले कोरोना विरुद्धको खोप लगाएका छन् । यहाँका स्वस्थ्य अधिकारीहरुले दिएको जानकारी अनुसार चीनका करिब ९० प्रतिशत नागरिकले कोरोना विरुद्धको खोप लगाएको जानकारी दिएका छन् ।शुक्रबारसम्मको तथ्यांकमा चीनका १ अर्ब २६ करोड नागरिकले खोप लगाएको जानकारी दिइएको छ । यो संख्या चीनको जनसंख्याको करिब ९० प्रतिशत हुन आउँछ ।
शनिबार दिइएको जानकारीमा तीमध्ये १ अर्ब २२ करोडले यो खोपको पूरा मात्रा लगाएका छन् । सो कुराको जानकारी चीनको नेशनल हेल्थ कमिसनका अधिकारी हि क्विनगुले दिनुभयो । शनिबार पत्रकार सम्मेलनमा उहाँले चीनमा नागरिकलाई कोरोना विरुद्धको खोप दिने क्रम जारी रहेको र शुक्रबारसम्म ९० प्रतिशतले खोप लिइसकेको बताउनुभएको हो ।

प्रत्येक वर्ष पौष शुक्ल पूर्णिमादेखि माघ शुक्ल पूर्णिमासम्म एक महिना विधिपूर्वक गरिने स्वस्थानी व्रत एवं माघ स्नान आजदेखि सुरु भएको छ । पौष शुक्ल पूर्णिमादेखि माघ शुक्ल पूर्णिमासम्म एक महिना स्वस्थानी व्रत र माघ स्नान गरिन्छ । पौष शुक्ल चतुर्दशीको दिन हात गोडाका नङ काटी स्नान गरी शुद्ध वस्त्र पहिरिएर यसको सुरुआत हुन्छ ।
बिहान माघ स्नान गरी नित्य मध्याह्नकालमा महादेवको पूजा गरिन्छ । बेलुकी स्कन्द पुराणको केदार खण्ड अन्तर्गत् माघ माहात्म्यको कुमार अगस्त्यबीच संवाद भएको स्वस्थानी व्रत कथा सुन्ने सुनाउने परम्परा छ ।

दमौली, ३ माघ (रासस)/ तनहुँका सरकारी कार्यालयमा सेवा लिन अनिवार्यरुपमा कोरोनाविरुद्धको खोप लगाएको कार्ड देखाउनुपर्ने भएको छ । जिल्ला प्रशासन कार्यालयले यही माघ ७ गतेदेखि जिल्लाभित्रका सबै सार्वजनिक निकायमा सेवा सेवा प्राप्त गर्न खोप कार्ड अनिवार्य गर्ने जनाएको छ । गृहमन्त्रालयको निर्णय अनुसार गत पुस २९ गते जारी आदेशबमोजिम कार्यालय, होटल, रेस्टुराँ, सिनेमा हल, रङ्गशाला, हवाईयात्रा, उद्यानमा प्रवेश गर्दा अनिवार्य खोप कार्ड देखाउनुपर्ने सहायक प्रमुख जिल्ला अधिकारी काशीराम गैरेले जानकारी दिनुभयो ।

अहिलेसम्म बागलुङमा अक्सिजनको जोहो हुन सकेको छैन । दोस्रो लहरमा कोरोना सङ्क्रमितको सङ्ख्या बढ्दै गएपछि अक्सिजनको व्यवस्थापनका लागि जिल्लास्थित व्यवसायी तथा अन्य व्यक्तिले अक्सिजन सिलिण्डर जम्मा गरेर पोखरादेखि भरेर ल्याएर प्रयोग गरिएको थियो । यस समस्याको अन्त्य गर्नका लागि धौलागिरि अस्पताल बागलुङमै अक्सिजन प्लान्ट निर्माणको सरकारले चालेको थियो तर गत भदौ महिनामा सुरु भएको अक्सिजन प्लान्टले अझै पूर्णत पाउन सकेको छैन तर जिल्लामा कोरोनाको दर पुनः उकालो लाग्न थालेको छ । अहिलेसम्म अक्सिजन प्लान्टले अक्सिजन उत्पादन नगर्दा समस्या पर्ने देखिएको छ ।

कोरोना संक्रमण बढेपछि हवाई यात्रुले फेरि अनिवार्य रुपमा फेससिल्ड लगाउनु पर्ने भएको छ । शुक्रबार बसेको मन्त्रिपरिषद् बैठकले आन्तरिक हवाई यात्रालाई सुरक्षित बनाउन यस्तो निर्णय गरेको हो । हवाईजहाजमा चालक दल तथा सबै यात्रुलाई मास्क तथा फेससिल्ड अनिवार्य गर्ने निर्णय भएको हो । हवाईजहाज भित्र सेनिटाइजरको व्यवस्था समेत हवाई कम्पनीले मिलाउनु पर्नेछ । वायुसेवा कम्पनीले हरेक उडानपछि हवाई जहाज र ब्यागेजलाई निसंक्रमित गराउनु पर्ने समेत निर्णयमा उल्लेख छ ।