Category: अन्तर्राष्टिय

भियतनामलेले २० देशमा हुने हवाई उडान फेरि खुल्ला गरेको छ । कोरोना भाइरसको महामारीका कारण बन्द गरिएको उडान सेवा महामारी कम भएपछि पुनः संचालन गर्न लागिएको अधिकारीहरूले जनाएका हुन् । उडान खुल्ला गरिएका देशहरूमा अष्ट्रेलिया, चीन, जापान, दक्षिण कोरिया, सिङ्गापुर, फ्रान्स, जर्मनी, रुस, अमेरिका लगायतका रहेका छन् । भियतनामको यातायात मन्त्रालय मातहतको यातायात विभागका निर्देशक त्रान बायो इन्गोकले अरु सात देशमा भने अझै पनि उडान खुल्ला नगरिएको जानकारी दिनुभयो ।

चीनमा स्थानीय स्तरका ४० जना कोरोना भाइरसका संक्रमित भेटिएका छन् । यहाँका अधिकारीहरुले सो कुराको जानकारी दिएका हुन् । प्राप्त समाचारअनुसार बिहीबार चीनका ग्वाङदोन, जान्सु, युनान लगायतका शहरहरुमा ती संत्रमित भेटिएका हुन् । चीनिया नेसनल हेल्थ कमिसनले सो कुराको जानकारी दिएको हो । तीमध्ये कतिपय नागरिकहरु बाहिरबाट आएका पनि रहेका छन् । सांघाइमा देशबाहिरबाट आएका केही संक्रमितहरु फेला परेका पनि अधिकारीहरुले जानकारी दिएका छन् ।

बेलायतको उत्तरी आयरल्याण्डमा स्थानीय समय अनुसार शुक्रबार युनिस नामक आँधी आइपुग्ने भन्दै चेतावनी दिइएको छ । मौसमविद्हरुले हिमपात, बरफ र तीब्र गतिको हावाहुरी एक साथ आउन सक्ने भएकाले सुरक्षित स्थानमा रहन नागरिकहरुलाई चेतावनी दिएका हुन् । आयरल्याण्डका धेरैजसो काउन्टीहरुमा स्कुल तथा कलेजहरु बन्द गरिएका छन् । आयरल्याण्डका कोर्क, केरी, वाटरफोर्ड र क्येयर शहर आँधीको बढी खतरामा रहेको भन्दै सो क्षेत्रमा रेड अलर्ट जारी गरिएको छ ।

कोरोना विरुद्धको खोप अनिवार्य गरिएको विरोधमा झण्डै एक महिनादेखि क्यानडाको राजधानी ओटावामा प्रदर्शन गरिरहेका ट्रक चालकहरुको अवरोध प्रहरीले छिट्टै हटाउने चेतावनी दिएको छ । ‌ओटावाको डाउन टाउनमा प्रदर्शनमा रहेका ट्रक चालकहरु माथि लामो समयसम्म सरकार नरम रुपमा प्रस्तुत भए पनि प्रदर्शनकारीहरु उग्र हुँदै आएपछि  प्रहरीले कडा कारवारी थाल्ने चेतावनी दिएको हो ।

ब्राजिलको पेट्रोपोलिस सहरमा भारी वर्षापछि आएको बाढी र पहिरोमा परी ९४  जनाको मृत्यु भएको अधिकारीहरुले जनाएका छन् । ब्राजिलको रियो दि जेनेरियो सहरबाट उत्तरी हिमाली क्षेत्रमा अवस्थित सो सहर अवरल वर्षाका कारण प्रभावित भएको हो । बाढीका कारण घरहरु क्षतिग्रस्त बन्नुका साथै सडकमै बाढीको पानी खोला जसरी बग्न थालेपछि कार लगायतका सवारी साधन बगाएको छ । बाढीले शहर नै तहस नहस बनाएपछि पेट्रोपोलिस शहरका मेयरले संकटकालको घोषणा गर्नुभएको छ ।

युरोपेली मुलुकहरु अस्ट्रिया र जर्मनीले कोरोना भाइरसको संक्रमण नियन्त्रणका लागि लागू गरिएको प्रतिबन्ध खुकुलो गरेका छन् । संक्रमण नियन्त्रणका लागि केही साता खोप अनिवार्य गरेपछि यी दुबै मुलुकले प्रतिबन्ध खुकुलो बनाएका हुन् । खोप नलगाउनेका लागि भने अझै पनि प्रतिबन्ध कायम रहेको जनाइएको छ । जर्मनीले आगामी २० मार्चमा स्वतन्त्रता दिवसदेखि सबैजसो प्रतिबन्ध हटाउने निर्णय गरेको छ ।
अस्ट्रियाले भने मार्च ५ देखि नै प्रतिबन्ध फुकुवा गर्ने घोषणा गरेको छ ।
पछिल्लो समय फैलिएको ओमिक्रोन भेरियन्टका कारण गम्भीर विरामी हुने दर र अस्पताल भर्ना हुने दर न्युन रहेकाले प्रतिबन्ध खुकुलो पार्दै लगिएको जनाइएको छ ।

लाखौँ बालबालिकाको ज्यान बचाउनका लागि उपचार आवश्यक रहेको भन्दै संयुक्त राष्ट्रसंघले तत्काल कदम चाल्न आह्वान पनि गरेको छ । संयुक्त राष्ट्र संघीय बालकोष युनिसेफले सोमालियामा कुपोषण संकटग्रस्त स्तरमा पुगेको पनि जनाएको छ । संयुक्त राष्ट्रसंघका अनुसार सोमालियाली जनसंख्याको एक चौथाइ अर्थात ४१ लाख नागरिक खाद्य सहायताको भरमा रहेका छन् ।

बेइजिङमा शीतकालीन ओलम्पिक चलिरहेका बेला भारी हिमपात र वर्षा हुँदा खेलमा सहभागी हुन आएका खेलाडी र पाहुना समेतले अत्यधिक चिसोका कारण प्रभावित भएका छन् । बेइजिङ मौसम विज्ञान पूर्वानुमान शाखाले बेइजिङमा आइतबारदेखि भारी हिमपात हुनसक्ने र शहरमा औसत ४ मिली मिटरभन्दा बढी हिमपात हुने जानकारी दिएको थियो । सडकमा धेरै हिमपात भएका कारण यातायात सेवा समेत प्रभावित बनेको छ ।